Champions League, Kosova me tre ekipe

Champions League e shahut, që është duke u zhvilluar për herë të parë në Shqipëri e për më tepër në Durrës, ka mbërritur në raundin e tretë. Në këtë aktivitet merr pjesë dhe Kosova, ndërsa gazetari sportiv, Gani Kosumi, që ndjek këtë veprimtari për Radio Televizionin Shqiptar tregon paraqitjen e deritanishme.

“Kosova po përfaqësohet me tri ekipe. Ditën e parë njëra nga skuadra, që është dhe kampione e Kosovës, Drejtësia Frokadero, shënoi fitore të thellë me rezultat 5.5-0.5. Dy ekipet e tjera pësuan disfatë”, thotë Kosumi.

Por cilat janë pretendimet e skuadrave kosovare në këtë aktivitet? Duke parë dhe forcën e kundërshtarëve Kosumi thotë:

“Kanë ardhur me pretendime për t’u renditur tek mesi i tabelës. Sepse me të vërtetë konkurrenca është shumë e fortë. Këtu janë shahistët më të fortë të Europës dhe të Botës. Dhe mendoj se mes 84 ekipesh të renditen mes vendit të 30-40. E ky do të jetë sukses i madh i shahut kosovar”, shpjegon Kosumi.

Champions League e shahut përfundon më 8 tetor.