Champions League, shorti dhuron përballje titanësh

Është hedhur në Nion të Zvicrës shorti i fazës së Play Off-it të këtij edicioni të Champions League. Play-Off-et e fazës eliminatore janë risi në formatin e ri të kompeticionit më të rëndësishëm europian për klube.

Ashtu  siç pritej goglat kanë dhuruar disa përballje shumë interesante që në këtë fazë të turneut, ku padyshim që spikat finalja e parakoshme Manchester City-Real Madrid.

Evitohet derbi italian në këtë fazë të kompeticionit, pasi goglat nuk kanë vënë përballë njëra-tjetrës Milanin dhe Juventusin. Kuqezinjtë do të luajnë kundër Fejnordit, ndërsa bardhezinjtë kundër PSV-së. Por në Play Off-do të kemi një derbi francez pasi PSG do të luajë kundër Brest, ndërsa Monako do të sfidojë Benfikën.

Goglat kanë qenë me fat për Bayernin e Mynihut, që eviton Manchester Sitin dhe do të përballet me Celtic në këtë fazë të turneut. Me fat ka qenë edhe Atalanta e Gjimshitit që do të ndeshet me Club Brugge, ndërsa Sportingu i Lisbonës do të përballet me Borussian e Dortmundit.

Ndërsa tetë skuadrat e para në fazën e ligës janë kualifikuar automatikisht për në raundin e 1/8-ve të finales, skuadrat që u renditën nga vendi 1 9-të deri në vendin e 24-të do të luajnë në  fazën me eliminim. Skuadrat do të luajnë dy ndeshje me sistem vajtje-ardhje në Play Off për të siguruar një vend mes 16 më të mirave të turneut.

Ndeshjet e para të Play Off-it do të luhen në datat 11 dhe 12 shkurt, ndërsa ato të kthimit në 18 dhe 19 shkurt. Shorti i çerekfinaleve dhe gjysmëfinaleve do të hidhet më 21 shkurt. Kujtojmë që finalja e Champions League do të luhet në 31 maj në Mynih.