Darka në Athinë, Kurti: Kusht për fqinjësinë e mirë, njohja reciproke

I pranishëm në darkën informale të zhvilluar në Athinë, me ftesë të kryeministrit Kyriakos Mitsotakis, kreu i qeverisë së Kosovës, Albin Kurti, ka vënë theksin te njohja reciproke si kusht për fqinjësi të mirë.

Sipas Kurtit, të gjitha shtetet që aspirojnë anëtarësim në Bashkimin Evropian duhet “t’i përmbahen dhe të zbatojnë demokracinë”.

“Minoritete do të ketë çdo herë, por kërkohet simetri dhe balancë në respektimin e minoriteteve bazuar në Konventën Kornizë për Mbrojtjen e Pakicave Kombëtare,” theksoi Kurti.

Deklarata e Kurtit vjen në një kohë kur marrëdhëniet mes Prishtinës dhe Beogradit nuk janë normalizuar pas tensioneve në veri të Kosovës. BE ka ndërmjetësuar dialogun mes dy vendeve, por ende nuk është gjetur dakordësia.

Në darkën informale morën pjesë edhe Presidentja e Komisionit Europian, Ursula von der Leyen; Presidenti i Këshillit Evropian, Charles Michel, Presidenti i Ukrainës, Volodymyr Zelenskyy; Kryeministri i Kroacisë, Andrej Plenkovic; Kryeministri i Rumanisë, Marcel Ciolacu; Kryeministri i Bullgarisë, Nikolai Denkov; Presidenti i Serbisë, Aleksandar Vucic; dhe Presidentja e Moldavisë, Maia Sandu.

Liderët diskutuan rreth pushtimit të Ukrainës nga Rusia, ku theksuan mbështetjen ndaj pavarësisë dhe integritetit territorial të Ukrainës. Po ashtu ata kërkuan përgjegjësi dhe ndëshkim për krimet e kryera gjatë luftës.

Takimi nënvizoi edhe mbështetjen për zgjerimin dhe anëtarësimin në Bashkimin Evropian. Në fund të takimit u miratua një deklaratë e përbashkët, e cila bën thirrje për rienergjizimin dhe rifokusimin në procesin e zgjerimit për anëtarësim në BE; mbështetje të palëkundur për pavarësinë e Ukrainës; ndëshkimin e krimeve të kryera gjatë luftës dhe thirrjen për përgjegjësi ndaj atyre që kryen krime.