De la Fuente: Meritojmë finalen, s’na ka falur askush asgjë!

Komisari teknik i Spanjës sapo mbylli konferencën e tij për shtyp në vigjilje të finales së madhe të Berlinit. De la Fuente transmetoi qetësi dhe siguri në grupin që drejton duke thënë: “Ne jemi me meritë të plotë në këtë finale. Kemi merituar ç’do gjë që kemi arritur në këtë turne pasi kemi bërë lojë dhe kemi shënuar gola. Kemi argëtuar edhe tifozët në shkallët e stadiumeve, pra kemi bërë gjithçka që i kishim vendosur vetes si qëllim përpara se të niste turneu”.

Mes të tjerash ai tregoi se ishte i bindur për forcën e grupin që drejtonte pasi vetëm pak javë më parë, pasi kishin bërë një ndeshje në “Olimpiastadion” të Berlinit, u kishte thënë lojtarëve se: “U thash të gjithëve atë natë se do të riktheheshim në Berlin. Mendoj se finalja do të luhet mes dy skuadrave më të mira të turneut. Tani duhet të përqëndrohemi dhe të mundohemi që të minimizojmë gabimet. Jemi në një moment special”.