Deçiç-Vllaznia, miqësore në “paqe”/ Trajneri Memelli, provon të gjithë lojtarët e federuar

Është mbyllur në barazim 1 me 1 miqësorja e Vllaznisë ndaj Deçiçit të Tuzit në Podgoricë të Malit të Zi, takim ky i luajtur në stadiumin OFK Titograd Podgorica. Një miqësore kjo që u zhvillua duke shfrytëzuar ndërprerjen e kampionatit të Superiores nisur nga ndeshjet e kombëtares së Shqipërisë për eleminatoret e Europianit “Gjermani 2024”. Ashtu siç pritej, kjo sfidë do të shërbente si test për Memellin i cili në këtë ndeshje aktivizoi të gjithë futbollistët që ka në dispozicion në listën e federimit. Në fushë u panë dy formacione të ndryshme, ku fillimisht u aktivizua formacioni i dytë. Pjesa e parë, pavarësisht se ka qenë e vakët sa u përket rasteve të shënimit, është mbyllur me fitoren minimale të Vllaznisë. Lajm i mirë për kuqeblutë është rikthimi te goli i sulmuesit Mehdi Çoba i cili kaloi në avantazh kuqeblutë në minutën e 35-të, ndërsa Deçiç arriti të barazonte vetëm në fundin e lojës, duke ndëshkuar portierin Qarri pas një goditje dënimi. Përgjithësisht, në 20 minutat e para nuk ka pasur shumë histori, pasi ekipet më tepër kanë luajtur në gjysmëfushë, ndërsa gabimet në pasime kanë qenë të shpeshta. Si kundërshtar i kuqebluve ishte fantazisti Kristjan Vulaj, i cili ishte titullar te Deçiçi, ndërsa në sezonin e kaluar me Vllazninë, edhe pse erdhi me shumë bujë, nuk la gjurmë në Shkodër. Në 45 minutat e dyta, Memelli hedh në fushë lojtarët titullar, me të cilët mndohet të luajë të mërkurën e ardhshme ndaj Partizanit për javën e tretë të kategorisë Superiore. Një pjesë e dytë, e cila ka pasur raste për të dyja skuadrat respektive, ku në limit të ndeshjes vjen goli i vendasve shënuar nga Stipoviç duke bërë që i gjithë takimi të mbyllet me shifrat e barabarta, 1 me 1.