Denaj: Çojmë përpara vizionin për bujqësi drejt standardeve evropiane
buk3
Pas betimit në Presidencë, ditën e djeshme, Anila Denaj ka marrë zyrtarisht detyrën e ministres së Bujqësisë dhe Zhvillimit Rural.
Në takimin e organizuar me këtë rast në ambientet e MBZHR-së, ministrja Denaj u prit nga ish-ministrja e Bujqësisë dhe Zhvillimit Rural Frida Krifca dhe titullarët e institucioneve të varësisë e drejtues të tjerë.
Në ceremoninë zyrtare të dorëzimit të detyrës ishte e pranishme zëvendëskryeministrja Belinda Balluku.
Në fjalën e saj, Krifca vlerësoi punën e stafit të Ministrisë së Bujqësisë dhe vuri në dukje se arritjet në disa prej prioriteteve të punës së institucionit, janë rezultat i kontributit të të gjithëve.
Ajo shprehu vlerësimet më të larta për ministren Denaj dhe njëherësh i uroi asaj suksese në detyrën e re, duke i dorëzuar edhe një dosje me arritjet, prioritetet dhe objektivat e ardhshme.
Anila Denaj, në detyrën e ministres së Bujqësisë dhe Zhvillimit Rural, falënderoi Krifcën për punën e bërë dhe shprehu angazhimin për vijimin e punës me prioritetet që ajo ka vendosur në detyrën e sapomarrë.
“Në prezantimin me stafin drejtues të këtij institucioni me zv.kryeministren Belinda Balluku, ku theksuam vijimin e punëve të mira të qeverisë shqiptare në shërbim të fermerëve, prodhuesve e të gjithë aktorëve në zinxhirin e vlerës agroushqimor”, u shpreh Denaj.
“Falënderime për punën e ministres Frida Krifca dhe të gjithë personelit të dedikuar, me të cilët do të çojmë përpara vizionin për një bujqësi të fortë, të qëndrueshme drejt standardeve evropiane”, tha Denaj.
