Dënimi i sulmit izraelit, Netanjah: Nuk dorëzohem deri sa të arrij qëllimin
Në mes të dënimit ndërkombëtar për sulmin mbi Rafah që u mori jetën shumë palestinezëve, kryeministri izraelit Benjamin Netanjah (Netanyahu) është zotuar të vazhdojë luftën kundër Hamasit.
Duke folur në parlamentin izraelit, Netanjahu tha se sulmi ishte një “fat tragjik” ndërsa shtoi se nuk do përfundojë luftën para se të arritjë qëllimet.
Ai tha se ishte jetike që Izraeli të merrte “çdo masë paraprake të mundshme” për të mbrojtur civilët dhe këmbënguli që Forcat e Mbrojtjes së Izraelit (IDF) po përdornin “përpjekjet e tyre më të mira për të mos dëmtuar ata që nuk janë përfshirë në konflikt”.
Fjalimi i Netanjahut u ndërpre nga shqetësimet e herëpashershme nga anëtarët e familjeve të pengjeve të marra nga Hamasi gjatë sulmit të 7 tetorit, disa prej të cilëve kanë qenë kritikë ndaj tij për dështimin për të arritur një marrëveshje për kthimin e të dashurve të tyre.
“Në Rafah ne kemi evakuuar tashmë rreth një milion banorë joluftëtarë dhe pavarësisht përpjekjeve tona maksimale për të mos dëmtuar joluftëtarët, fatkeqësisht diçka shkoi në mënyrë tragjike të gabuar. Ne po hetojmë incidentin dhe do të arrijmë në përfundime sepse kjo është politika jonë”, tha ai.
Sipas ministrisë së shëndetësisë të drejtuar nga Hamasi, të paktën 45 njerëz humbën jetën si pasojë e sulmit izraelit, ndërsa qindra të tjerë u trajtuan për djegie të rënda e fraktura.
Këshilli i Sigurimit i OKB-së do të mbajë një takim urgjent këtë të martë, me kërkesë të Algjerisë, për të diskutuar sulmin në Rafah.
Organizatat ndërkombëtare janë rreshtuar për të dënuar sulmin, me BE-në që këmbëngul që Izraeli të respektojë vendimin e Gjykatës Ndërkombëtare të Drejtësisë (ICJ) për të ndaluar sulmet në Rafah.
Pavarësisht vendimit të GJND-së, Izraeli është zotuar të vazhdojë me pushtimin e Rafahut, me zyrtarët që këmbëngulin se vendimi i linte hapësirë sulmit në përputhje me ligjin ndërkombëtar.
