Deputetja britanike: Perëndimi ka përgjegjësi për Ballkanin, sulmin në Banjskë e paralajmërova që në qershor

Deputetja britanike, Alicia Kearns ka deklaruar se bota perëndimore ka përgjegjësi për Ballkanin, ndërsa ka theksuar se sulmin në Banjskë e paralajmëroi që në qershor.

Teksa ka shpërndarë një video të presidentit ukrainas Volodymyr Zelenksy, që dha alarmin  se Rusia po planifikon luftë të re e në rrezik është Ballkani, Kearns nënvizoi se ajo e ka përsëritur shqetësimet që i pati bërë publike muaj më parë.

Të enjten, Zelensky ka bërë thirrje për më shumë vëmendje për Ballkanin, përfshirë Kosovën, pasi që sipas tij ka informacione se Rusia po planifikon që të nisë një luftë për ta larguar vëmendjen nga Ukraina.

“Kam paralajmëruar vazhdimisht se ne duhet ta gjejmë përkushtimin tonë në Ballkan dhe të mos përsërisim dështimet e parandalimit.

Ballkani është në fqinjësinë tonë dhe kemi përgjegjësi historike. Unë kam paralajmëruar në qershor se çfarë mund të shohim në Kosovë, por u hodh poshtë.

Fatkeqësisht, shqetësimet e mia u bënë realitet”, ka shkruar ajo rrjetin social ‘X’.

Para se të ndodhte sulmi në Banjskë nga forcat serbe, deputetja britanike Kearns alarmoi në muajin qershor, Parlamentin se në kishat ortodokse serbe në Kosovë janë futur armë të kontrabanduara nga Serbia.

Në fund të shtatorit, forca të armatosura serbe vranë rreshterin Afrim Bunjaku në Banjskë të Zveçanit, por pas ndërhyrjes së Policisë së Kosovës u eliminuan 4 persona nga i gjithë grupi që ishte i strehuar në Manastirin e Banjskës.