Dërgohet për gjykim i mituri / 15 – vjeçari vrau me thikë një të mitur tjetër në tetorin e vitit 2024
Prokuroria e Shkodrës ka njoftuar mbylljen e hetimeve dhe dërgimin në gjykatë të një shtetasi të mitur, rreth 15 – vjeçar, i cili është nën akuzë për veprën penale “vrasja në rrethana cilësuese”.
Sipas organit të akuzës, nga hetimet e zhvilluara në bashkëpunim me Drejtorinë Vendore të Policisë Shkodër provohet se, në datën 14.10.2024, rreth orës 19:30, në vendin e quajtur lagjja “Skënderbeg”, rruga “Ing.Gjovalin Gjadri”, të qytetit të Shkodrës, i mituri 15- vjeçar, në konflikt me ligjin, pas një konflikti për motive të dobëta me një të mitur tjetër, e ka qëlluar këtë të fundit me një send prerës shpues, thikë duke i shkaktuar plagë vdekjeprurëse.
Prokuroria Shkodër, shpreh angazhimin e plotë për vënien para përgjegjësisë ligjore të personave që kryejnë vepra penale kundër jetës dhe shëndetit të personit.
