Devolliçja shpallet ”Kryevlerë Kombëtare e Trashëgimisë Kulturore Jomateriale”

Këshilli Kombëtar i Trashëgimisë Kulturore Jomateriale ka vendosur në listën e kryevlerave kombëtare, vallen devolliçe. Vendimi vjen pas shqyrtimit të propozimit të Shoqatës atdhetare kulturore “Devolli” dhe bashkisë së Devollit.

Vallja e famshme devolliçe, simboli i zonës, është një valle burrash që vjen në trajtën e një balade, fillon ngadalë shtruar, mbështetur fort në tokë, duke pasqyruar jetën, sakrificat, mbijetesën, luftën dhe në fund atmosferën dinamike festive të fitores.

Nga shek 19 kjo valle vjen në format më të vjetra, e kënduar dhe më pas e interpretuar me vegla muzikore ndërsa regjistrimet e para të saj i përkasin fillimit të shek të 20. Kjo valle trashëgohet brez pas brezi.

Me këtë rast është organizuar një aktivitet për të prezantuar këtë vendim, ku të pranishëm ishin përfaqësues të institucioneve të ndryshme.