Dialogu Kosovë-Serbi, Lajçak: Në interes të dy vendeve. Vuçiq: Disa vende evropiane po lobojnë fuqishëm kundër nesh

I dërguari i posaçëm i Bashkimit Evropian për dialogun, Miroslav Lajçak, gjatë një takimi që ka pasur me presidentin serb Aleksandar Vuçiq në Davos, vuri theksin te Marrëveshja e Ohrit e cila sipas tij, ka hapur mundësi për avancimin e normalizimit të marrëdhënieve mes Prishtinës e Beogradit.

Po ashtu, në takimin mes dyshes, është diskutuar gjendja aktuale e dialogut mes dy vendeve, ndërsa Lajçak u shpreh se përparimi i këtij procesi është në interes si të Kosovës ashtu edhe të Serbisë përsa i përket integrimit në Bashkimin Evropian.

“Theksova se Marrëveshja e Ohrit 2023 hapi rrugën përpara për normalizimin. Përparimi i mëtejshëm është në interes të Serbisë, Kosovës dhe të ardhmes së tyre në Bashkimin Europian”, shkruan Lajçak në rrjetin social X.

Nga ana e tij, presidenti Vuçiq shprehu shqetësimin e tij për politikën evropiane ndaj Kosovës ndërsa njoftoi se Beogradi do të intensifikojë bisedimet me Uashingtonin kur bëhet fjalë për dialogun.

“Pra, ata në Evropë së shpejti do të fillojnë të vijnë përsëri me ide, siç u përpoqëm shumë me Kurtin, dhe tani le t’i japim, të bëjmë diçka për të, kështu që ata do të bëjnë për Këshillin e Evropës dhe për shumë gjëra të tjera”, tha Vuçiq.

Presidenti shtoi se e gjithë kjo po udhëhiqet nga një grup vendesh që po lobojnë jashtëzakonisht shumë si kundër Serbisë ashtu edhe në favor të Prishtinës.