Digjitalizim dhe shkëmbim dokumentesh mes arkivave të Shqipërisë e Maqedonisë së Veriut
Drejtori i përgjithshëm i Arkivave, Ardit Bido ka zhvilluar një takim me homologen e Arkivit Shtetëror të Republikës së Maqedonisë së Veriut, Natasha Kotllar-Trajkova.
Në këtë takim, palët parashtruan propozime për thellimin e bashkëpunimit mes institucioneve arkivore, me qëllim shkëmbimin e dokumenteve me interes reciprok dhe të përvojave, mbajtjen e aktiviteteve kulturore të përbashkëta, avancimin e procesit të digjitalizimit të dokumenteve dhe rritjen e zhvillimin e kapaciteteve profesionale të punonjësve.
Ky shkëmbim vjen 4 muaj pas mbajtjes në Tiranë të një tryeze të rrumbullakët me krerët e arkivave të Ballkanit, të Europës dhe më gjerë, në kuadrin e aktiviteteve të zhvilluara në 75-vjetorin e themelimit të DPA-së.
Krijimi i mundësive të reja për intensifikimin e bashkëpunimit mes dy arkivave, kontribuon në promovimin e trashëgimisë historike të kombeve respektive, si edhe në koordinimin e veprimtarisë në fushën e arkivistikës.
