Dinari serb, Kosova e Serbia takohen sot në Bruksel

Zyrtarë të Kosovës dhe Serbisë do të takohen këtë 27 shkurt në Bruksel. Takimi është konfirmuar nga Bashkimi Evropian, ndërsa sqarohet më tej se në fokus do të jetë përdorimi i dinarit serb, temë kjo e cila ka sjellë jo pak përplasje mes Beogradit dhe Prishtinës.

Zëdhënësja e BE-së, Nabila Massralli, ka bërë me dije se të dyja palët kanë konfirmuar se do dërgojnë përfaqësuesit e tyre për këtë takim, për të cilin shtoi se do të zhvillohet në “formatin e zakonshëm të dialogut”.

Në takimin e sotëm nga pala e Kosovës do të marrë pjesë guvernatori i Bankës Qendrore të Kosovës Ahmet Ismaili, ndrësa ekipi serb do të udhëhiqet nga kryenegociatori Petar Petkoviq.

Banka Qendrore e Republikës së Kosovës (BQK) me vendimin e marrë për ndalimin e përdorimit të dinarit serb, nxiti reagimin e Serbisë, e cila e akuzon Prishtinën se kërkon të krijojë kushte të padurueshme për jetën e serbëve.