Dinastia Marubi, njëqind vite të studios fotografike shqiptare
Me rastin e 100-vjetorit të themelimit të dinastisë Marubi, një prej emrave më të njohur në historinë e artit fotografik shqiptar, Galeria e Artit Tiranë mirëpriti ekspozitën “Dinastia Marubi – Njëqind vite të studios fotografike shqiptare”, një nga ekspozitat më të rralla me fotot bardhezi të Marubëve.
Në këtë ekspozitë u shfaqën fotografi të rralla nga koleksionet e tri gjeneratave të fotografëve të dinastisë Marubi, Pietro, Kel dhe Gegë Marubi, imazhe të marra nga arkiva e viteve 1865–1959 me mbi 150 mijë xhama negativë të Muzeut Kombëtar “Marubi” në Shkodër.
“Kjo ekspozitë patjetër që është e rëndësishme edhe për vetë faktin se është ndoshta e para që ne kemi sjellë, një rrugëtim i dinastisë në pothuajse 160 vite histori. Pse në Tiranë? Sepse Muzeu ‘Marubi’ kohët e fundit po tenton ta shtrijë ndikimin e vet përtej Shkodrës. Tirana është një hap i parë dhe shumë shpejt një tjetër moment do të jetë edhe Prishtina,” tha Luçjan Bedeni, drejtor i Muzeut “Marubi”.
Këto imazhe, të ekspozuara për publikun e kryeqytetit në Galerinë e Artit Tiranë, në vitin 2016 u ekspozuan në Muzeun e Fotografisë të Amsterdamit FOAM dhe në Muzeun Kombëtar të Fotografisë “Marubi” në 2019.
