Dita e Europës, ambasada amerikane: Të përkushtuar ndaj vlerave të përbashkëta

Ambasada e SHBA-së në Tiranë ka uruar sot nëpërmjet një reagimi në rrjetet sociale, Ditën e Europës, duke garantuar se SHBA qëndron e përkushtuar në mbështetjen ndaj vlerave të përbashkëta demokratike dhe prosperitetit të ndërsjellë.

Gjithashtu në postimin e saj ambasada e SHBA-së ka ndarë dhe deklaratën e Sekretarit të Shtetit Antony Blinken në Ditën e Europës, duke theksuar se “sot, ne festojmë unitetin dhe lidhjet e qëndrueshme mes Shteteve të Bashkuara dhe Europës.

“Gëzuar Ditën e Europës miqve tanë në mbarë Europën! Sot, ne festojmë unitetin dhe lidhjet e qëndrueshme mes Shteteve të Bashkuara dhe Europës. Ne qëndrojmë të përkushtuar në mbështetjen tonë ndaj vlerave të përbashkëta demokratike dhe prosperitetit të ndërsjellë. Urime miqve tanë europianë. Për bashkëpunimin e vazhdueshëm, miqësinë, dhe një të ardhme të ndritur së bashku”, thuhet në mesazhin e ambasadës së SHBA-së në Tiranë.

Në deklaratën e tij, Sekretari i Shtetit Blinken u shpreh se “ndërsa festojmë Ditën e Evropës, ne festojmë gjithashtu partneritetin midis Shteteve të Bashkuara dhe Evropës”.

Në emër të popullit amerikan, jam i lumtur të bashkohem me qytetarët e Bashkimit Evropian ndërsa ju festoni Ditën e Evropës.

Shtatëdhjetë e katër vjet më parë, Ministri i Jashtëm francez Robert Schuman ndau vizionin e tij për një komunitet kombesh që mund të ndërtojnë një të ardhme më të begatë për njerëzit e Evropës. Kjo ide çoi në formimin e Komunitetit Evropian të Qymyrit dhe Çelikut, i cili çoi në Traktatin e Mastrihtit, duke sjellë në jetë vizionin e Schuman-it për bashkëpunim më të ngushtë, të menduarit krijues dhe unitetin e qëndrueshëm në të gjithë Evropën.

Ndërsa festojmë Ditën e Evropës, ne festojmë gjithashtu partneritetin midis Shteteve të Bashkuara dhe Evropës. Ne jemi krenarë që qëndrojmë së bashku teksa ndihmojmë Ukrainën të mbrohet, të mbështesim popullin ukrainas dhe të mbajmë Rusinë përgjegjëse për agresionin e saj. Ne jemi të nderuar t’u bashkohemi aleatëve dhe partnerëve evropianë ndërsa shënojmë 75-vjetorin e NATO-s dhe formojmë të ardhmen e Aleancës sonë. Ne jemi të përkushtuar në mbështetjen tonë të vlerave të përbashkëta demokratike dhe prosperitetit të ndërsjellë ekonomik. Pa dyshim, marrëdhënia jonë transatlantike është më e fortë se kurrë.

Urime dhe urime për qytetarët, shtetet anëtare dhe institucionet e Bashkimit Evropian – Gëzuar Ditën e Evropës!