Dita Ndërkombëtare e Pyjeve, Kumbaro: Pyjet janë pasuruar me fidanë të rinj
Në Ditën Ndërkombëtare të Pyjeve, ministrja e Turizmit dhe Mjedisit, Mirela Kumbaro, publikoi online pamje mbresëlënëse nga pyjet shqiptare.
“Edhe këtë vit Ministria e Turizmit dhe Mjedisit, Agjencia Kombëtare e Pyjeve, Agjencia Kombëtare e Zonave të Mbrojtura, bashkitë me shoqata, vullnetarë dhe akademinë ia kanë dalë me sukses të pasurojnë sipërfaqet e pyjeve me fidanë të rinj dhe të çojnë përpara planet e menaxhimit dhe punën shkencore për ruajtjen dhe rritjen e këtyre pasurive”, shkroi ministrja Kumbaro.
Në këtë ditë, Organizata e Kombeve të Bashkuara bën thirrje t’i bashkohemi kauzës që për vitin 2025 ka temën: “Pyjet dhe Ushqimi – E ardhmja e ushqimit fillon në pyje”.
Pyjet janë mjetet e jetesës së miliona familjeve. Ato ofrojnë ushqime thelbësore si frutat, farat, rrënjët dhe mishi i egër, burime themelore për komunitetet rurale dhe indigjene.
Por funksioni i tij shkon shumë përtej. Pyjet janë një burim jetik energjie, duke siguruar dru për gatim, duke luajtur një rol kyç në bujqësi duke pritur pjalmuesit dhe duke vepruar në pasurimin e tokës, rregullimin e klimës dhe ruajtjen e biodiversitetit. Përveç kësaj, pellgjet ujëmbledhëse të pyllëzuara furnizojnë me ujë të ëmbël më shumë se 85% të qyteteve kryesore të botës. Në situata krize, pyjet bëhen një mjet shpëtimi ekonomik dhe ushqimor, duke siguruar deri në 20% të të ardhurave të familjes në zonat rurale, duke garantuar një dietë të shëndetshme.
Por këto ekosisteme tashmë janë në rrezik. Planeti ynë humbet 10 milionë hektarë në vit për shkak të shpyllëzimit dhe afërsisht 70 milionë hektarë të prekur nga zjarret. Mbrojtja dhe rivendosja e pyjeve është urgjente dhe e nevojshme, sepse mirëqenia e planetit dhe brezave të ardhshëm varet prej tyre.
