“Doctor Honoris” për albanologun/ Universiteti i Shkodrës “Luigj Gurakuqi” i akordon titullin akademikut arbëresh Francesco Altimari

Përmes një ceremoniali të veçantë universiteti i Shkodrës “Luigj Gurakuqi”, me miratimin e Ministrisë së Arsimit dhe Sportit, i ka akorduar titullin e lartë “Doctor Honoris Causa” studiuesit arbëresh dhe albanologut të shquar, profesor Francesco Altimari, me motivacionin për kontributin e tij të çmuar në promovimin e studimeve mbi gjuhën dhe kulturën shqiptare, si dhe për angazhimin e tij të palodhur në ruajtjen e gjuhës dhe identitetit arbëresh në Itali. Në fjalën e tij, profesor Altimari e cilësoi këtë titull si një privilegj dhe nderim të veçantë, ndërkohë që theksoi nevojën urgjente për kontributin e akademikëve dhe studiuesve në ruajtjen dhe promovimin e pasurisë së gjuhës arbëreshe. Profesor Francesco Altimari është anëtar nderi i Akademisë së Shkencave të Shqipërisë dhe Kosovës. Me kërkimet e tij të thelluara dhe përkushtimin akademik, ka shërbyer si një urë e rëndësishme lidhëse mes traditave shkencore shqiptare dhe atyre perëndimore, duke ndihmuar në ndërkombëtarizimin e tyre.