Dolën për peshkim dhe u rrezikuan nga dallgët, shpëtohen nga mbytja 2 persona në Shëngjin

Policia kufitare iu ka ardhur në ndihmë 2 personave të cilët rrezikuan të mbyteshin teksa peshkonin, për shkak të dallgëve të larta.

Shërbimet e SPK Shëngjin janë nisur për të ofruar ndihmë sapo janë njoftuar se në hapësirën ujore ndërmjet Shëngjinit dhe Tales, për shkak të dallgëve të larta të detit, kishin mbetur të bllokuar 2 persona ndërkohë që peshkonin.

“Si rezultat janë lokalizuar, marrë në mjetin lundrues të Policisë Kufitare dhe transportuar në portin e Shëngjinit, shtetasit Gj. L., 56 vjeç, dhe S. L., 43 vjeç, të cilët janë në gjendje të mirë shëndetësore. Gjithashtu, është tërhequr në hapësirën e portit, mjeti ujor me të cilin ata peshkonin.

Dy shtetasit kanë falënderuar shërbimet e Policisë Kufitare për gatishmërinë dhe ndihmën e ofruar menjëherë”, thuhet në njoftimin e policisë. 

Ndërkaq, Policia e Shtetit apelon që në çdo rast nevoje të kontaktohet me strukturat e saj, sepse reagimi dhe ndihma do të jenë të menjëhershëm.