Duka pas rinovimit të Silvinjos: Duam kualifikimin në Kupën e Botës

Presidenti i FSHF-së, Armand Duka nuk ka vonuar të reagojë pas njoftimit të rinovimit të trajnerit Silvinjo dhe ndihmësve të tij. “Projekti i nisur nuk mund të ndalej”, ka theksuar ndër të tjera Duka në një postim në rrjetet sociale. “Tani e gjithë vëmendja është për të shkuar për herë të parë në Kupën e Botës”.

Postimi i plotë:

Projekti i nisur me trajnerin Sylvinho dhe stafin e tij, Zabaleta e Doriva, nuk mund të ndalej.

Në asnjë moment nuk kemi pasur dyshime për vazhdimësinë dhe tani edhe e kemi konkretizuar me hedhjen e firmës mbi kontratë, deri në dhjetor të vitit 2025.

Që në fillim kishim synim kualifikimin në Euro 2024 dhe ia dolëm. Tani e gjithë vëmendja është për të shkuar për herë të parë në Kupën e Botës.

Besimi se mund t’ia dalim është prezent dhe stafi teknik, futbollistët dhe e gjithë Federata do të punojnë për të arritur këtë qëllim.