Dumani hedh poshtë akuzat e Metës: Nuk e kam takuar kurrë McGonigal!

Kreu i Prokurorisë së Posaçme Kundër Korrupsionit dhe Krimit të Organizuar, Altin Dumani reagoi sot lidhur me akuzat e ish-presidentit dhe kreut aktual të Partisë së  Lirisë Ilir Meta se është takuar me ish-agjentin e FBI-së, Charles McGonigal.

“Unë nuk e kam takuar kurrë McGonigal. Gjithçka është thënë në media, është në vazhdën e akuzave të vazhdueshme, të pabaza që bëhen për institucionin që unë drejtoj. Nuk ka pasur asnjë arsye për të takuar McGonigal, as nuk e kam njohur kurrë dhe emrin ia kam dëgjuar pas publikimeve në mediet shqiptare”, tha Dumani në një reagim për mediet shqiptare.

I ftuar të hënën në një intervistë televizive, zoti Meta tha se Kreu i Prokurorisë Speciale Kundër Krimit të Organizuar dhe Korrupsionit Altin Dumani, është mbrojtës i pandëshkueshmërisë së kryeministrit Edi Rama dhe se Dumani nisi hetimet ndaj tij pas takimit me McGonigal.

Charles McGonigal, është një ish-zyrtar i FBI i arrestuar për lidhje me rusët dhe marrje ryshfeti. Ish-kreu i kundërzbulimit në FBI ka udhëtuar në Shqipëri dhe ka marrë para nga një ish-zyrtar shqiptar. McGonigal, është deklaruar vitin e kaluar fajtor në gjykatën federale të Uashingtonit, duke pranuar se ka fshehur pagesa sekrete të bëra në drejtim të tij nga një ish-zyrtar i zbulimit shqiptar. Ai ka pranuar se ka falsifikuar të dhënat dhe ka bërë deklarata të rreme në lidhje me 225,000 dollarët që mori nga ish-agjenti i inteligjencës shqiptare, gjatë kohës që punonte për FBI-në.