Dy vite nga pushtimi rus, Perëndimi premton mbështetje për Ukrainën
Kryeministrat e Italisë dhe Kanadasë nënshkruan marrëveshje sigurie me Ukrainën të shtunën, ndërsa liderët perëndimorë u mblodhën rreth Kievit të lodhur nga lufta në përvjetorin e dytë të pushtimit ushtarak të Rusisë.
Pas sukseseve fillestare në zmbrapsjen e ushtrisë ruse, Ukraina ka pësuar pengesa kohët e fundit në fushat e betejës lindore, me gjeneralët e saj që ankohen për mungesë në rritje të armëve dhe ushtarëve.
Duke kërkuar të largojë shqetësimet se Perëndimi po humbet interesin për konfliktin, Giorgia Meloni i Italisë dhe Justin Trudeau i Kanadasë vizituan Kievin së bashku me Presidenten e Komisionit Evropian Ursula von der Leyen dhe kryeministrin belg Alexander De Croo, për të shprehur vijimin e mbështetjes së tyre.
“Mesazhi që dua t’i dërgoj sot te i gjithë populli ukrainas është se ata nuk janë vetëm. Unë dua që ju të dini se ne jemi thellësisht mirënjohës,” tha Meloni ndërsa nënshkroi një pakt 10-vjeçar të mbrojtjes me presidentin e Ukrainës Volodymyr Zelenskiy.
Edhe kryeministri kanadez Trudeau nënshkroi një marrëveshje të ngjashme dhe premtoi rreth 2.25 miliardë dollarë mbështetje financiare dhe ushtarake këtë vit për Ukrainën.
“Ne do të qëndrojmë me Ukrainën me gjithçka që duhet, për aq kohë sa të duhet,” tha Trudeau.
Presidenti Zelenskiy i çoi liderët perëndimor për të parë aeroportin Hostomel, vendi i një beteje të egër në fillimin e pushtimit rus.
“Dy vjet më parë ne takuam ushtarët e armikut këtu me zjarr, dhe dy vjet më vonë, ne po takojmë miqtë tanë, partnerët tanë, këtu. Çdo njeri normal dëshiron që lufta të përfundojë. Por askush nga ne nuk do të lejojë që Ukraina jonë të humbasë. Fjala “i pavarur” do të qëndrojë gjithmonë pranë fjalës “Ukrainë” në historinë e ardhshme,” tha Zelenskiy, raporton Reuters.
Marrëveshjet e sigurisë kanadeze dhe italiane pasqyrojnë pakte të ngjashme të nënshkruara së fundmi me Francën dhe Gjermaninë.
Perëndimi e sheh pushtimin rus si një akt të pajustifikuar agresioni që duhet të zmbrapset .
