E burgosur për të drejtat e grave, aktivistja iraniane fiton Çmimin Nobel për Paqe

Narges Mohammadi, një aktiviste iraniane për të drejtat e njeriut, është nderuar me Çmimin Nobel për Paqen. Ajo u nderua me këtë çmim për luftën e saj kundër shtypjes së grave në Iran dhe përpjekjet e saj për promovimin e të drejtave të njeriut dhe lirisë për të gjithë.

Narges Mohammadi është një aktiviste iraniane dhe nënkryetare e Qendrës së Mbrojtësve të të Drejtave të Njeriut.

Mohammadi ka marrë disa dënime me burg që nga viti 2011 dhe aktualisht po mbahet në burgun famëkeq Evin të Teheranit për “përhapje propagande”.

Këtë vit ajo u përfshi gjithashtu në 100 Gratë e BBC-së, një listë e profilit të lartë prej 100 grave frymëzuese dhe me ndikim nga e gjithë bota.

Emrat e të nominuarve mbahen sekret, por më shumë se 350 njerëz dhe grupe ishin në garë këtë vit. Fituesi i këtij viti do të marrë çmimin prej 11 milionë Krona Suedeze, ekuivalente me gati një milion dollarë amerikanë. Kjo është një rritje prej 10% nga shuma e vitit të kaluar.

Po ashtu, fituesit do t’i jepet gjithashtu një diplomë dhe një nga medaljet ikonike prej ari 18 karatësh të Komitetit të Nobelit.

Që nga fillimi i tij në 1901, Çmimi Nobel për Paqe u është dhënë 110 individëve dhe 30 organizatave.

Çmimi i vitit të kaluar u nda midis aktivistit të të drejtave të njeriut Ales Bialiatski, Qendrës së Ukrainës për Liritë Civile, e cila dokumenton krimet e supozuara të luftës dhe Memorial, një grup i të drejtave të ndaluara në Rusi.

Fitues të tjerë të kaluar kanë përfshirë aktivisten pakistaneze për edukimin e fëmijëve Malala Yousafzai dhe Abiy Ahmed, Kryeministrin e Etiopisë.

Po ashtu edhe disa organizata kanë marrë çmimin disa herë. Komiteti Ndërkombëtar i Kryqit të Kuq e ka fituar tri herë dhe Zyra e Komisionerit të Lartë të Kombeve të Bashkuara për Refugjatët e ka fituar dy herë./ BBC