E mbijetuara e sulmit të Hamas, u përzgjodh të përfaqësojë Izraelin në Eurovizion 2025

Këngëtarja izraelite Yuval Raphael do të përfaqësojë këtë vit Izraelin në Festivalin Evropian të Këngës. Me mbështetjen e votës së publikut, ajo fitoi një konkurs televiziv muzikor, i cili e kualifikoi si pjesëmarrëse në Eurovizion .

Këngëtarja 24-vjeçare i ka mbijetuar sulmit të Hamasit më 7 tetor 2023. Artistja po festonte me miqtë në festivalin Nova, kur u sulmuan nga militantët e grupit palestinez. Raphael mbijetoi duke u fshehur nën trupat e pajetë brenda një strehe pranë vendit ku po zhvillohej ngjarja muzikore.  “Muzika është një nga faktorët më të fortë që ndikoi në procesin e shërimit tim “, u shpreh ajo pas fitores së garës muzikore.

Në një intervistë ajo tha se do të përdorte daljen e saj në Eurovizion për t’i treguar botës historinë e vendit të saj ashtu siç e ka përjetuar ajo. Kënga me të cilën do të garojë artistja izraelite pritet të përzgjidhet dhe publikohet në muajin mars.

Eurovizioni i vitit të kaluar u shënua nga polemika dhe protesta mbi vendimin e tij për të lejuar Izraelin të konkurronte për shkak të luftës në Gaza. Konkurrentja izraelite në vitin 2024, Eden Golan u urdhërua nga organizatorët e Eurovizionit të ndryshonte titullin e këngës së saj, i cili i referohej sulmit të 7 tetorit 2023, në respekt të rregullave të konkursit që ndalonin deklaratat politike. Zvicra fitoi konkursin vitin e kaluar dhe sipas traditës pret këtë vit nga dtata 13 deri më 17 maj edicionin e 69-të, ku artistët nga 37 vende të ndryshme, përfshirë Shqipërinë, do të garojnë në Bazel.