Edi Rama flet nga vila e Enver Hoxhës: E mposhtëm fantazmën që jetonte këtu

Kryeministri Edi Rama ka pritur presidentin francez Emanuel Makron në vilën e ish-diktatorit Enver Hoxha teksa theksoi se tashmë ky mjedis është shndërruar në një vendtakimi për artistët edhe fantazma që jetonte këtu është mposhtur.

“Kërkuam që nuk duhet parë dora e arkitektit duhet të shohim ndryshimin e hapësirës nga errësira në dritë dhe të krijohet energjia e lirë për shtëpinë, ku kuptohet ka pasur dikur një fantazmë por më fund kjo hapësirë është e çliruar. Dhe fantazmën mund ta përmendim sa herë të duam dhe ajo është në dispozicionin tonë dhe jo ne në dispozicionin e saj. E kemi mposhtur”, u shpreh Rama.

Kryeministri shkoi më tej kur u shpreh se po të vijonte ende periudha e regjimit komunist të diktatorit Enver Hoxha, do të ushtrohej një terror i pashembullt ndaj të ftuarve francezë me në krye presidentin Makron.

“Një pjesë e madhe që nuk supozohej të vinit kurrë në Shqipëri dhe sikur ne të ishim ende në filozofinë e ish-pronarit, ne sot duhet t’ju vrisnim të gjithëve ju dhe të merrnim peng presidentin e Republikës. Për më tepër ka armiq të popullit shqiptar këtu, një i ri që e ka lënë Shqipërinë kur ishte ende në barkun e nënës së tij duke zbritur nga malet më të larta të Shqipërisë në shtigjet torturuese dhe aty filloi të vallëzonte për t’u bërë koreograf i madh në Francën e Lirë”, theksoi Rama, duke e shoqëruar me të qeshur.

Ndërkaq, më herët ministrja e Kulturës, Elva Margariti bëri të ditur se vila e ish-diktatorit Enver Hoxha është hapur për artin duke u shndërruar në një rezidencë artistësh përmes një bashkëpunimi me fondacionin francez “Art Explora”.

Sipas Margaritit, shndërrimi i kësaj vile me një rezidencë artistësh, është dënimi më i keq në botën e përtejme të fantazmës që e posedonte.

“Vështirë ta ndash nëse ngjallte më shumë frikë apo kuriozitet një objekt i poseduar nga fantazmat e së shkuarës.

As restaurime të plota nuk kemi bërë. Mes dilemës nëse duhej ta linim të rrënohej bashkë me kujtesën e saj apo të ruhej si dëshmia e 50 viteve të rrëmbyera nga jetët e të gjithë shqiptarëve.

Nëse muret e kësaj shtëpie do të flisnin se çfarë kanë dëgjuar për artin që pas çlirimi e deri në rënien e diktaturës do tregonin se si poseduesi i kësaj vile e përdorte herë si mjet propagande, herë për të manipuluar turmën  e herë për të mbyllur, mbytur e mallkuar e prerë krijimtarinë e jetën e artistëve, poetëve, muzikantëve. E në fakt është një listë mjaft e gjatë e të persekutuarve dhe dënuarve për shkak të artit.

Ne jemi të paduruar të përjetojmë kohën kur kjo vilë të mos quhet më vila e Enverit, por vila e artit, një hapësirë e munguar dialogu”, tha Margariti.

Ministrja u shpreh më tej shndërrimi i vilës së Hoxhës, në një rezidencë artistësh, e kthen Shqipërinë në një destinacion jo vetëm turistik, por edhe artistik.

“Në këtë shtëpi paradoksesh ne sot i hapim rrugë edukimit të brezit të ri përmes artit. Kjo rezidencë artistësh e kthen Shqipërinë në destinacion turistik e artistik”, u shpreh Ministrja.