Egnatia e Vllaznia, dyshe titulli
Egnatia e Vllaznia ecin me hap titulli në krye të renditjes, me vetëm dy pikë distancë nga njëra-tjetra. Kampionët janë skuadra perfekt, me pesë fitore më 2025, ndërsa shkodranët kanë katër fitore dhe vetëm një humbje, shkaktuar pikërisht nga skuadra rrogozhinase.
Egnatia vazhdon marshimin e vitit 2025 duke arritur fitoren e pestë radhazi, në po aq ndeshje të zhvilluara këtë vit në Abissnet Superiore, ndërkohë që ecën pa e ngadalësuar hapin edhe në Kupën e Shqipërisë, tashmë me një këmbë në gjysmëfinale. Në të njëjtin hap me kampionët në fuqi ecën edhe Vllaznia, e cila në pesë ndeshjet e vitit 2025 ka katër fitore dhe vetëm një humbje, pikërisht kundër Egnatias.
Është pikërisht ajo fitore 2-0 në Shkodër që i ka dhënë mundësinë skuadrës së Edlir Tetovës të bëjë parakalimin në renditje karshi kuqebluve, të mbetur vetëm me dy pikë larg, ndërkohë që kanë mbetur pas Dinamo e Partizani, këto të dyja tashmë edhe me ngërç në nivelin e lojës, përtej lënies së pikëve.
Egnatia është rikthyer tashmë në makinerinë e vajisur mirë, ku të gjitha ingranazhet lëvizin në unison e me të cilat janë ingranuar më së miri edhe blerjet e reja, të kërkuara nga Tetova, ndërkohë që diamanti i skuadrës tani është Regi Lushkja, që udhëheq me dhjetë golat e tij. Vllaznia ndoshta nuk është makineria perfekt si Egnatia, por tërhiqet drejt majës ka individët e saj të çmuar.
Bekim Balaj është lideri dhe golashënuesi i skuadrës, por dritat e skenës tashmë po i merr përherë e më tepër “Fëmija i tmerrshëm” Kevin Dodaj, 19-vjeçari fantastik që mban gjallë traditën e shkëlqyer të prodhimit të talenteve nga akademia e Vllaznisë.
Bashkë me kapitenin dhe të riun edhe Esat Mala, tashmë në moshë pjekurie, motori i palodhur i kuqebluve. Dy skuadra që ndezin garën e kampionatit, në pritje të Dinamos e Partizanit që të kenë rigjetur formën në maj, për të garantuar një katërshe fantastike titulli.
