Ekspertët ligjorë kërkojnë nga Mbretëria e Bashkuar të ndalë shitjen e armëve Izraelit

Tre ish-gjyqtarë të Gjykatës së Lartë i janë bashkuar më shumë se 600 ekspertëve ligjorë në thirrjen që qeveria e Mbretërisë së Bashkuar t’i japë fund shitjes së armëve në Izrael.

Në një letër drejtuar kryeministrit, ata thanë se eksportet duhet të përfundojnë sepse Mbretëria e Bashkuar rrezikon të shkelë ligjin ndërkombëtar për “rrezikun e mundshëm të gjenocidit” në Gaza.

Ndalimi shitjes së armëve në Izrael nga Mbretëria e Bashkuar do të shtonte presionin diplomatik dhe politik mbi Izraelin, në një kohë kur sjellja e tij në konfliktin e Gazës po vihet nën një shqyrtim të ri ndërkombëtar.

Ekspertët ligjorë thonë se ndalja e shitjes së armëve në Izrael do të shmangë bashkëpunimin e Mbretërisë së Bashkuar në shkelje të rënda të ligjit ndërkombëtar.

Thirrjet në rritje për pezullimin e licencave të eksportit të armëve nga Mbretëria e Bashkuar vijnë pasi 7 punonjës të ndihmës humanitare u vranë në një sulm ajror izraelit në Gaza.

Mbretëria e Bashkuar ka licencuar armë për Izraelin me vlerë mbi 574 milionë funte që nga viti 2008. Licencat e eksportit të armëve, të cilat jepen nga departamenti i biznesit, nuk mund të lëshohen nëse ekziston një rrezik i qartë që armët mund të përdoren në një shkelje serioze të ligjit ndërkombëtar humanitar.