“Erdha të them se jam mirë” – Bona Mulaj promovoi vëllimin poetik në Bibliotekën “Marin Barleti”

“Erdha të them se jam mirë”, me këtë titull erdhi para lexuesve poetja Bona Mulaj në librin e saj më të ri.

Takimi promovues u zhvillua në një nga sallat e Bibliotekës publike “Marin Barleti”. Autorja e trajton dashurinë jo vetëm si përvojë personale, por edhe si një fenomen me dimension të pasur kulturor e shpirtëror. Ajo ia dedikon librin dy bijve të saj.

Ky libër e sjell Bonën në një dimension tjetër, shprehen disa nga të ftuarit e këtij takimi.

Muzika pasuroi këtë takim letrar, teksa zëri i këngëtares Savjana Vjerdha dhe tingujt e Markelian Kapidanit shoqëruan aktivitetin së bashku me interpretimet poetike nga pjesëmarrësit.

Bona Mulaj është jo vetëm një poete e spikatur, por edhe një aktiviste në mbrojtje të të drejtave të grave në shoqërinë shqiptare.