Erërat e forta përkeqësojnë situatën. Autoritetet në gatishmëri nga frika e rishfaqjes të vatrave të tjera

Pothuajse një javë pasi kodrat përreth morën flakë, Los Angeles jeton me frikën se erërat do të forcohen dhe se do të ketë shpërthime të reja të zjarreve.

“Këto kushte ekstreme dhe të rrezikshme jo vetëm që ndërlikojnë shumë luftën kundër zjarreve në vazhdim, por ato po e bëjnë më të mundshëm që të ndodhin shpërthime të reja,” paralajmëruan meteorologët amerikanë.

Kushtet në zonën e Los Anxhelosit janë “jashtëzakonisht të favorshme” për zjarret, dhe tashmë ka erëra të forta deri në 120 kilometra në orë në vende që do të vazhdojnë të paktën deri të mërkurën, deklarojnë ata.

“Ne do të vazhdojmë të përdorim të gjitha mjetet që kemi në dispozicion për të luftuar zjarret”, premtoi dje presidenti në largim Joe Biden.

Erërat e ngrohta dhe të thata pritet të kenë forcë “si uragani”, tha kryebashkiaku i Los Anxhelosit Karen Bass.

E rrethuar nga flakët që nga e marta e kaluar, qendra urbane me popullsinë e dytë më të madhe në të gjithë SHBA-në vazhdon të numërojë të vdekurit: numri zyrtar i të vdekurve arriti në 24 një ditë para të dielës, sipas autoriteteve lokale.

Në periferi të përfshira nga flakët, ekipet e shpëtimit me mbështetjen e qenve të trajnuar posaçërisht vazhdojnë të kërkojnë rrënojat për trupa.

“Është një detyrë shumë e mundimshme dhe, për fat të keq, ne gjejmë çdo ditë trupa”, tha sherifi i qarkut të Los Angeles, Robert Luna.

Megjithatë, përpjekjet e mijëra zjarrfikësve, përfshirë ata të dërguar nga Meksika fqinje, janë rikthyer për të kontrolluar pjesërisht dy zjarret më të mëdha në 24 orët e fundit.

Zjarrfikësit që po operojnë kanë marrë përforcime njerëzore dhe materiale, mes tyre dhjetëra tankera dhe janë gati për të përballuar krizën, raportojnë oficerët e tyre.

Për shkak të plaçkitjeve, u vendos një shtetrrethim 12-orësh në zonat më të goditura.

Autoritetet lokale njoftuan të hënën se nëntë të dyshuar janë ndjekur penalisht për raste të kësaj natyre.

Më shumë se 12,000 shtëpi, ndërtesa të tjera dhe automjete u shkatërruan plotësisht ose pjesërisht nga zjarret, të cilat mund të rezultojnë të jenë më të kushtueshmet në historinë e SHBA-së, sipas vlerësimeve paraprake.

Në një deklaratë për shty, Presidenti Biden paralajmëroi se “do të kushtojë dhjetëra miliarda dollarë për ta rikthyer Los Anxhelosin në gjendje.”