Euro League në RTSH/ Zyrtare, “Final Four” do të zhvillohet në Abu Dabi

Me qëllim për të rritur sa më shumë të ardhurat e një lige emergjente siç është Euro League e basketbollit, drejtuesit e këtij kompeticioni kanë vendosur që të dërgojnë në Abu Dabi finalet e njohura ndryshe si “Final Four”.

Basketbolli europian kërkon që të rritet edhe më shumë si nga ana financiare, por edhe sa i përket famës dhe për këtë motiv katër ekipet më të mira të këtij sezoni do të vendosin se cila do të kurorëzohet kampione pikërisht në Abu Dabi.

Deri më tani nuk janë bërë zyrtare shifrat dhe nuk dihet se për sa sezone do të mbahet “Final Four” në Abu Dabi, por sipas “El Pais” për këtë finale sezoni, Euro League do të përfitojë plot 25 milionë $.

Ndeshjet e Euro League janë një ekskluzivet i Radio Televizonit Shqiptar. Gjysmëfinalet do të luhen më 23 maj, ndërsa dy ditë më vonë do të mbahen dy finalet e tjera, për vendin e tretë dhe të katërt si dhe ajo për vendin e parë dhe të dytë..