EURO U-19 për vajza/ Arlinda Kodra dhe Vesa Paçarizi: Kërkojmë mbështetjen e tifozëve në “Elbasan Arena”

Shqipëria e vajzave U-19 është gati për ndeshjen e parë ndaj Qipros, e vlefshme për raundin e dytë të Kampionatit Europian 2024. Ekipi ka mbyllur përgatitjet dhe sot do të luajë takimin e parë në stadiumin “Elbasan Arena”, në ora 15:30.

Dy futbollistet e ekipit Kombëtar U-19, Arlinda Kodra dhe Vesa Paçarizi kanë dhënë një prononcim për fshf.org. Mesfushoret e Kombëtares U-19 tregojnë se si kanë shkuar përgatitjet dhe kërkojnë mbështetjen e tifozëve në stadiumin “Elbasan Arena”.

Arlinda Kodra tha se atmosfera brenda grupit është shumë e mirë dhe shtoi se fokusi është vetëm te ndeshja me Qipron.

“Jemi grumbulluar që ditën e diel. Atmosfera është shumë e mirë, kemi një grup të mirë dhe shpresojmë që të marrim një rezultat pozitiv. Ne po punojmë për të treja ndeshjet, por fillimisht fokusi jonë është te sfida me Qipron. E njohim pasi kemi luajtur dhe kemi fituar, por në futboll nuk ka asnjëherë kundërshtarë të lehtë dhe do ta vlerësojmë maksimalisht”, – shprehet Kodra, e cila tregon dhe synimin në këto sfida kualifikuese.

“Synimi jonë është të ngjitemi në Ligën A, do t’i marrim ndeshjet me radhë dhe shpresojmë në rezultate pozitive. Mbështetja jonë më e madhe janë tifozët dhe i bëj thirrje të jenë të pranishëm, që të na mbështesin për të arritur rezultate të mira”, – përfundon Arlinda Kodra.

Vesa Paçarizi tha se është shumë e lumtur që është pjesë e Kombëtares U-19 dhe shtoi se objektivi kryesor është arritja e rezultateve pozitive.

“Jam shumë e lumtur që kam marrë ftesën e Kombëtares U-19 dhe pres me padurim të tregojë më të mirën. Ne jemi grumbulluar që të dielën. Atmosfera brenda ekipit është shumë e mirë, kemi zhvilluar disa seanca stërvitore dhe shpresojmë që të dalim sa më mirë.

Objektivi? Objektivi ynë i parë është që të marrim rezultate pozitive. I bëj thirrje edhe tifozëve që të jenë pranë nesh dhe të na mbështesin”, – tha Vesa Paçarizi.