Euroliga në RTSH: Partizani mposht Parisin në Beograd

Java e 23-të në Euroligë ka nisur me një ndeshje të zjarrtë teksa Partizani i Beogradit ka fituar ndaj Parisit 92-86 në një betejë të madhe në kryeqytetin serb. Fillimi ishte më i mirë për francezët në këtë transfertë ku menjëherë nisën të shënonin nga jashtë zone me disa trepikësha që e çuan avantazhin edhe me dy shifra.

Perioda e parë është e veçantë, Parisi shënon 34 pikë në 10 minuta me saktësi të madhe në gjuajtje. Avantazhi i francezëve do të zgjaste 15 minuta pasi më tej nis Partizani të shënojë rresht trepikëshat duke marrë udhëheqjen e takimit e madje duke e mbyllur pjesën e parë me 54 pikë në shënim dhe me 5 pikë avantazh.

Në periodën e tretë, Parisi hyn ndryshe në lojë, trajneri brazilian Tiago Spliter i kërkon të tijëve agresivitet dhe kështu ndodh. Shtohen faullat dhe Parisi arrin të barazojë e madje dhe të kalojë në avantazh por me vetëm 2 pikë. Menjëherë nis Partizani të rikuperojë me Jones dhe Lundberg në fillim të periodës së katërt.

Trepikëshat e Pokusevskit si dhe loja e mirë në mbrotje e Lakic bën që Partizani të shkojë deri në 9 pikë avantazh dhe të mos e humbas udhëheqjen e takimit deri në fund. E veçanta e kësaj ndeshje janë trepikëshat pasi në pjesën e parë, Partizani arrin deri në 72% saktësi, ndërsa Parisi me 63 % .

Për Parisin dallohet Shorts me 19 pikë ndërsa Partizani ka 5 lojtarë me dy shifra në shënim. Me këtë fitore Partizani qëndron në vend të 11 në pritje të ndeshjeve në dy ditët e ardhshme pasi mund të ngjitet deri në vend të 8-të, ndërsa Parisi nga vendi i 3-të zbret në vend të 7-të.