Euroliga në RTSH: Real Madrid fiton nën kullën Eifel

Real Madrid fitoi ndaj Parisit 85-96 në kryeqytetin francez pas një beteje që vijoi për të gjithë minutat e lojës. Skuadra parisiene kishte një mungesë të rëndësishme, organizatorin T.J. Shorts që u ndje shumë.

Perioda e parë nisi me një avantazh të shpejtë të francezëve por spanjollët reaguan dhe menjëherë e morën nën kontroll falë 3 trepikëshave me Campacon dhe Hezonjen. Më tej është edhe Sergi Lull që futet në ritmin e trepikëshave madrilenë dhe Reali krijon një avantazh prej 10 pikësh. Parisi arrin që ta ulë diferencën dhe pjesa e parë mbyllet 48-52.

Në periodën e tretë është Musa që me depërtimet e tij e vë edhe një herë në vështirësi mbrotjen e Parisit dhe sërish një avantazh dyshifror për “Los Blancos”. Parisi e mbeshtet lojën vetëm tek Maodo Lo dhe Hifi dhe të dy sëbashku e çojnë ndeshjen në barazim në fillim të periodës së katërt.

Ne fillim 70-70, më tej 77-77 por francezët nuk munden dot më ta mbajnë ritmin. Campaco, Tavarez dhe Hezonja në minutat e fundit i japin një shtysë spanjollëve fillimisht me +8 pikë avantazh e më pas deri ne +11 pike.

Kjo është humbja e dytë radhazi për Parisin pas 10 fitoreve dhe e kombinuar me fitoren e Monacos me Bajern Mynih, skuadra e principatës merr kreun, ndërsa Parisi zbret në vend të dytë por me pikë të barabarta. Për Real Madrid nuk ka ndryshim, qëndron në vend të 13, por loja e sotme është shpresëdhënëse për rikthimin e spanjollëve aty ku i takon.