Fakulteti i Arkitekturës dhe Ndërtimit me shtëpi të re në 2026

Në fillim të vitit 2026 studentët e Fakultetit të Inxhinierisë së Ndërtimit dhe Fakultetit të Arkitekturës do të kenë shtëpinë e tyre të re. Korpusi i ri i dy fakulteteve është duke u ndërtuar, ku do të pajiset me sallat e leksioneve, laboratorët, bibliotekat dhe hapësirat rekreative, të gjitha projektuar për të mbështetur procesin akademik dhe me standardet më moderne.

Ministrja e Arsimit, Ogerta Manastirliu tha se për vitin 2024 buxheti që i dedikohet infrastrukturës së arsimit të lartë për të rritur standardet e edukimit në sistemin universitar në vend është 1.5 miliard lekë. Këtë investim, Manastirliu e shikon si një xhevahir që i shtohet investimeve në arsimin e lartë.

“Po shoh se si një investim publik po ecën me ritme të mira për dy fakultete e rëndësishme që në fillim të 2026 do të kenë shtëpinë e re. Ky është një tjetër xhevahir që i shtohet kolanës së investimeve në arsimin e lartë. Vetëm për 2024 buxheti për infrastrukturën e arsimit të lartë është 1.5 miliardë lekë dhe synon të përmirësojë standardet për studentët”, tha Manastirliu.

Ministrja tha gjithashtu se mes bashkive dhe universiteteve do të ketë një bashkëpunim në realizmin e projekteve dhe ekspertiza që kërkohen.

“Një tjetër hap që do hedhin është të krijojmë mundësinë që edhe bashkitë të mund të përfitojnë nga bashkëpunimi me universitetet për të krijuar mundësinë e bashkëpunimit për realizmin e projekteve dhe këtu futemi në një tjetër hapësirë ku në universiteteve tona të marrin ekspertizën e nevojshme dhe të bëjnë projektet apo trajnime që kërkojnë”, tha ajo.

Fakulteti i Inxhinierisë së Ndërtimit dhe Fakulteti i Arkitekturës dhe Urbanistikës po rindërtohen duke i zënë vendin objektit ekzistues të dëmtuar nga tërmeti.