Fëmijët “pushtojnë” kinemanë, nxënësit e shkollave 9-vjeçare të Shkodrës shijuan filmin e shfaqur për ta

Kinema “Republika” rihapi dyert sërish për publikun e vet. Spektatorët e tij në këtë ditë ishin të veçantë. Bëhet fjalë për nxënësit e shkollave 9-vjeçare të qytetit që “pushtuan” sallën e brendshme të kinemasë, për të shijuar filmin e animuar, të shfaqur për ta në monitorin gjigand.

Një pjesë e mirë e spektatorëve të vegjël kishin “takimin” e tyre të parë me mjediset e kinemasë,  ndaj për ta ishte jo vetëm një kohë e kaluar bukur nën shoqërinë e njëri-tjetrit, por edhe një kohë zbavitëse duke parë një nga filmat e tyre të preferuar.

Policia Bashkiake e Shkodrës ndërhyri fundvitin që shkoi duke rimarrë godinën e Kinemasë që emërtohej “Millennium” prej 23 vitesh. Ajo përbën një nga godinat më të veçanta të qytetit për nga stili arkitekturor. Rikthimi i emërtimit të vjetër të kinemasë së qytetit u mirëprit nga qytetarët shkodranë. Ata e lidhin emërtesën me kohën kur kinemaja përjetonte periudhën e saj më të mirë. Kinema “Republika” hapi dyert e saj me fillimin e edicionit të shtatë të festivalit “Ekrani i Artit”. Në mjediset e tij u shfaqën të gjithë filmat e këtij festivali.