Festa tradicionale e Vermoshit, shenjti “Shpjetër” gjallëroi atmosferën në skajin më verior të vendit

Festa e Shenjtit Shpjetër në Vermosh të Kelmendit gjallëroi atmosferën në skajin me verior të Shqipërisë. Ardhja e emigrantëve në këtë periudhë i jep tjetër zhvillim jetës këtu. Ata nuk vijnë thjeshtë të kalojnë disa ditë pushime, por janë gjithashtu edhe kontribues në aspektin material.

Investimi më i fundit i tyre, pritet të finalizohet brenda 3 viteve, ku kisha e re e Shën Gjonit, pritet të jetë një ndër më të bukurat në Ballkan. Ndërtimi i saj, sipas At Viktor Demës, njëherësh dhe organizator i festës, do të ketë një impakt të menjëhershëm në zhvillimin e Vermoshit.

Festës tradicionale në Vermosh i parapriu një meshë, e cila u mbajt nga At Mirash Marinaj, famullitar i Tuzit.

Festa bashkoi banorët e mjaft fshatrave të Kelmendit, të cilët zgjodhën të vinin këtu për të festuar së bashku. Pas meshës, nën ritmet e këngëve dhe valleve, festa mori ngjyrat e bashkimit e vllazërimit. Vermoshi, si një nga 100 fshatrat turistik të Shqipërisë, mbetet një destinacion i preferuar nga vizitorët, por ende i paeksploruar aq sa duhet nga ata.