Festivali teatror për të rinj / Prej ditësh po vijojnë audicionet në shkollat e mesme të Shkodrës

Për të gjashtin edicion, teatri “Migjeni” do të vazhdojë të organizojë Festivalin Teatror për të Rinj “Youth Theatre” me pjesëmarrjen e shkollave të mesme publike dhe jopublike të qytetit dhe njësive administrative të tij. Këtë vit do të jenë pjesëmarrëse 9 shkolla të mesme, ndërsa audicionet kanë nisur prej ditësh.

Zhvillimi i këtij festivali është një mundësi e mirë për të afruar të rinjtë me teatrin, ndërsa për këtë të fundit për të zbuluar elementë të spikatur.

Shkolla e mesme profesionale “Hamdi Bushati” është njëra nga pjesëmarrëset e këtij edicioni. Ajo rikthehet pas dy vitesh si e tillë.

Vitin e kaluar, gjimnazi “Jordan Misja” rrëmbeu çmimin e parë me dramën premierë që trajton fenomenin e dhunës në shoqëri “Riedukimi i Apolonit” i regjisorit Vladimir Doda.