Fjalimi i Ramës, Basha: Dy orë fjalë pa fund, por dështoi në përpjekjen për të pastruar veten

Kreu i Partisë Demokratike, Lulzim Basha ka reaguar pas fjalës së kryeministrit Edi Rama para deputetëve socialistë dhe ministrave në Kryesinë e Kuvendit. Në një deklaratë për mediat, Basha ironizoi fjalën e gjatë të Ramës, teksa e konsideroi si një “2-orsh me fjalë pa fund”.

Sipas Bashës, Rama tentoi të “pastronte veten”, por dështoi. Kryedemokrati akuzon kryeministrin si përgjegjës politik për rastet e korrupsionit në radhët e qeverisë.

“Fjalimi më i gjatë i një drejtuesi që nga koha e komunizmit. Dy orë për t’i mbushur mendjen qytetarëve se përgjysmimi i vendit në këto vite nuk janë përgjegjësi e Edi Ramës. 2 orë për t’i mbushur mendjen vetes se radha e gjatë e bashkëpunëtorëve që ndodhen sot në qelitë e SPAK në kërkim ndërkombëtar për korrupsion apo nënë hetim për vjedhje, nuk janë në përgjegjësinë e Ramës dhe as qeverisë. 2 orë fjalë pa fund për të shpjeguar sikur të ishte 2-orëshi i parë i qeverisjes së tij dhe jo fundi. E vërteta dihet mirë nga çdo shqiptar.

Dukej se ky 2-orsh i dhimbshëm për t’u dëgjuar, u rëndon socialistëve, atyre që i janë përgjysmuar familjet. Në 2 orë, Rama dështoi të përmendte emrat e disa prej bashkëpunëtorëve të tij më të ngushtë. Asnjë vend tjetër nuk ka parë që një kryeministri t’i kapen në flagrancë zv.kryeministri, ministri, kryebashkiaku i tij i preferuar, dhjetëra drejtorë dhe ai të mos pranojë përgjegjësinë politike që ka për këtë orgji korrupsioni. Një përpjekje për të pastruar veten nga ajo që çdo kush e di”, tha Basha.