Fjalimi i Vuçiq në OKB, Gërvalla: Përpjekje për të shtrembëruar historinë, SHBA dhe BE të dënojnë gjuhën e përdorur

Ministrja e Punëve të Jashtme e Kosovës, Donika Gërvalla ka reaguar ndaj deklaratave të bëra nga Presidenti serb Aleksandër Vuçiq (Aleksandar Vucic) në OKB.

Gërvalla shprehet se Vuçiq u përpoq që të krahasojë pavarësinë e Kosovës me agresionin në Ukrainë dhe kjo sipas saj është tentativë për shtrembërimin e historisë.

“Si Ministre e Punëve të Jashtme dhe Diasporës i Republikës së Kosovës, dënoj fuqishëm dhe refuzoj tërësisht si të pavërteta dhe tentativën për të shtrembëruar historinë deklaratat e bëra nga Presidenti i Serbisë gjatë prezantimit të tij sot para Asamblesë së Përgjithshme të Kombeve të Bashkuara. Ndër të tjera, ai e barazon agresionin rus në Ukrainë me pavarësinë e Kosovës, duke pretenduar paturpësisht se në vitin 2008 Serbia përjetoi atë që po kalon sot Ukraina”, thuhet në komunikatën e MPJ-së.

Ministrja theksoi se presidenti serb jo vetëm po tenton të deformojë historinë, por po keqpërdor rëndë platformën e OKB-së.

Gërvalla i ka bërë thirrje Shteteve të Bashkuara të Amerikës dhe Bashkimit Evropian që të dënojnë fjalimin e Vuçiqit.

“I bëjmë thirrje komunitetit ndërkombëtar, veçanërisht BE-së dhe SHBA-së, të dënojnë një gjuhë të tillë të përdorur nga Presidenti i Serbisë në OKB dhe t’i kujtojnë atij detyrimet që ka marrë në Bruksel dhe Ohër”, thuhet më tej në komunikatë.