Fluks aplikimesh për Magjistraturën, fokusi te integriteti dhe aftësitë analitike

Në një kohë kur sistemi i drejtësisë po vuan nga mungesa e magjistratëve, boshllëk që u krijua nga procesi i vetingut, Shkolla e Magjistraturës vijon të nxjerrë magjistratët e rinj.

Për këtë sezon, institucionet e drejtësisë kanë kërkuar hapjen e kuotave për 10 gjyqtarë, 12 prokurorë dhe 6 kuota për ndihmë ligjore në gjykata e prokurori.

“Numri i kuotave këtë vit është më i ulët se vitin që kaloi apo vitet paraardhëse. Deri më tani ka 280 aplikime fizike në shkollë dhe pritshmëritë janë që ky numër të rritet bazuar në aplikimet që kandidatët bëjnë ‘online’ nëpërmjet platformës që kemi në dispozicion, e cila deri më tani ka 350 aplikime,” tregon Borana Mustafaraj, shefja e Drejtorisë së Formimit Profesional, në një intervistë për RTSH.

Në sitë për pastërtinë e figurës dhe pasurinë nuk kalojnë vetëm prokurorë dhe gjyqtarë, por edhe studentët kandidatë do i nënshtrohen vetingut.

“Shkolla i kushton rëndësi primare integritetit të kandidatëve dhe së bashku me këshillat, që në momentin që ata shpallen fitues, fillon një kontroll i figurës dhe i pasurisë së tyre përpara se ata të marrin statusin e kandidatit për magjistrat,” sqaron znj. Mustafaraj.

Risi e këtij viti akademik është edhe teza e rishikuar e provimit të pranimit.

“Është gjithnjë sfidë që ky provim të jetë i përshtatshëm dhe të japë shanse të barabarta për sukses për të gjitha kategoritë, pavarësisht background-it të tyre. Kjo ishte arsyeja pse në ndryshimin që iu bë formatit të tezës dhe strukturës së vlerësimit të njohurive, shkolla u bazua në arsyetimin, në aftësitë analitike dhe argumentuese që ofronin kandidatët dhe jo në aftësitë apo njohuritë mbi ligjin,” thotë drejtoresha e Formimit Profesional.

Edhe Avokatura e Shtetit ka shpallur vakancë për 7 vende në nivelin vendor.