Frederik Rreshpja, poeti “bohem”, dimensioni i tij i gjerë shtrihet edhe në prozë dhe përralla

E kanë quajtur “të vetmuarin e madh”, shpesh edhe “bohem”.  Ai ishte rebel në gen dhe i paqtë në shpirt.  19 korriku shënon përvjetorin e lindjes së poetit të madh shkodran dhe mjeshtrit të fjalës, Frederik Rreshpja.

“Të paarritshëm” e konsideron Rreshpjen miku i tij dhe shkrimtari i njohur Xhahid Bushati. Ky i fundit rreth dy vite më parë do të realizonte një monografi për poetin e shquar.

Rreshpja i madh nuk u studiua asnjëherë mjaftueshëm. Dimensioni  i  tij ishte i një fushe të madhe lëvruese,  jo vetëm në poezi,  por edhe në prozë e përralla, shprehet Bushati.

Poetika e Frederik Rreshpjes prekte të gjitha ndjenjat njerëzore,  por më së shumti atë të vetmisë. Përmes përdorimit të metaforave të fuqishme, ai ishte këndonjësi më i ëmbël i saj.