Frikë në Lisbonë, konferenca e Benficës u ndërpre nga një… tërmet

Momente frike në Portugali. Një tërmet me magnitudë 4.7 ballë të shkallës Rihter është ndjerë në Lisbonë dhe zona të tjera fqinje të vendit. Epiqendra u zbulua në Seixal, 20 kilometra në jug të kryeqytetit portugez dhe fatmirësisht nuk shkaktoi dëme. Ka qenë Benfica dhe trajneri i saj, Bruno Lage që kanë vuajtur pasojat.

Teksa trajneri po i afrohej sallës së shtypit ku ishte caktuar konferenca për shtyp, qendra sportive e Benfica-s filloi të dridhej.

Pamjet u kapën nga kamerat e gazetarëve të cilët ishin gati të dëgjonin deklaratat e trajnerit në prag të ndeshjes së dytë të play-offit të Champions League kundër Monakos.

Megjithatë, konferenca u zhvillua pak më vonë dhe Bruno Lage e komentoi incidentin si më poshtë: “Nëse do t’ju tregoja atë që i thashë asistentit tim Lemos… Po ngjiteshim shkallëve kur dëgjuam një zhurmë. Unë thashë se duhej të riparonim derën e xhamit që kishim përballë. Vetëm pasi mbërrita këtu kuptova se çfarë kishte ndodhur në të vërtetë”.