Futboll kategoria e dytë/ Tërbuni mund Adriatikun 3-0 dhe e mbyll në vendin e katërt

Java e 11-të e Kampionatit Kombëtar të futbollit për kategorinë e dytë ka mbyllur konkurimin për fazën e parë. Përballja e fundit për këtë fazë për ekipin e Tërbunit të Pukës u luajt në stadiumin “Ismail Xhemali” të Pukës duke u ndeshur me ekipin e Adriatikut.

Ndonëse sfida në fjalë u luajt në prezencën e temperaturave të ulta, në fushën e lojës është parë një luftë e fortë sportive për të dy ekipet. Pukjanët e drejtuar nga trajneri Sinan Bardhi, e kishin detyrim për ta fituar këtë ndeshje, dhe në fund ia arritën qëllimit duke e mbyllur ndeshjen në favorin e tyre me rezultatin 3 me 0.

Dy golat e parë për pukjanët janë shënuar me autor Tabakun,  një ne pjesën e parë dhe një në të dytën.  Kur pritej reagimi I skuadrës mysafire Adriatik për të gjetur golin, është përsëri Tërbuni që dikton në fushën e lojes. Për të mbyllur gjithçka në favor të Tërbunit mendon Obando, I cili duke shënuar në limit të krejt ndeshjes, fikson avantazhin e merituar të Tërbunit me rezultatin 3-0.

Me këtë tre pikësh, Tërbuni renditet në vendin e katërt me 15 pikë, ndërkohë që më sipër janë rivalët Valbona, Besëlidhja dhe Iliria, përkatësisht me 28, 27 dhe 23 pikë.Nga sa bëhet e ditur, në merkaton e janarit, KF Tërbuni, pritet të përforcohet me lojtarë cilësor në përmbydhje të objektivave për kualfikimin në kategorinë e parë.