“Gatuaj një pjatë më shumë” – Solidaritet në ndihmë të familjeve në nevojë për festat e fundvitit!
Nisma “Gatuaj një pjatë më shumë”, e inicuar prej disa vitesh me radhë nga organizata vullnetare “Eko Mendje” në Shkodër, po kthehet tashmë në një traditë që synon të ndihmojë familjet në nevojë dhe të sjellë ngrohtësi në tryezat e tyre gjatë këtyre ditëve festive.
Falë kontributit të dhuruesve dhe angazhimit të vullnetarëve, gjatë këtyre ditëve janë shpërndarë me qindra pako me ndihma, kryesisht ushqimore.
Ndihmat kanë mbërritur te familje me probleme sociale, shëndetësore dhe shumë të tjerë që kanë nevojë për mbështetje.
Shoqata e të rinjve vullnetarë “Eko Mendje” është vlerësuar pak ditë me parë si “Vullnetari i vitit 2024”.
Të rinjtë vullnetarë të “Eko Mendje” prej disa vitesh punojnë në drejtim të ruajtjes dhe promovimit të mjedisit natyror si dhe mbështetjes së familjeve të varfëra.
