Gazment Bardhi i kërkoi interpelancë duke akuzuar Olsi Ramën, Kryeministri: Prit SPAK-un

Kryeministri Edi Rama ka refuzuar kërkesën për interpelancë urgjente të bërë nga deputeti demokrat Gazment Bardhi lidhur me akuzat e këtij të fundit se “vëllai i kryeministrit, Olsi Rama është i përshirë në laboratorin e drogës në Xibrakë”.

Përmes një postimi në platformën X, Rama thekson se këto janë akuza të fabrikuara, për të cilat vëllai i tij ka bërë kallëzim në SPAK ndaj Gazment Bardhit, ndërsa shton se motivet e kësaj kërkesë për interpelancë nuk përfshihen te “synimet dhe qëndrimet e punës së qeverisë për të raportuar para Kuvendit”.

“Rregullorja e Kuvendit thotë shprehimisht se, citoj, “interpelanca është kërkesa me shkrim, që i drejtohet kryeministrit, zv.kryeministrit ose çdo anëtari tjetër të kabinetit qeveritar mbi motivet, synimet, qendrimet e Këshillit të Ministrave, lidhur me aspekte te rendesishme te veprimtarise se tyre”.  Duke vënë re se akuzat, fabrikimet, fantazitë e një deputeti apo grupi deputetësh, lidhur me familjarët e kryeministrit, zv.kryeministrit ose të çdo anëtari tjetër të kabinetit qeveritar, nuk kanë asnjë lidhje me motivet, synimet, qëndrimet e Këshillit të Ministrave, kërkesa për interpelancë  nga deputeti Gazmend B më gjen në pamundësinë e plotë për ta përmbushur”, shkruan Rama.

Rama thekson se çështja është në dorën e SPAK-ut, ku i bën thirrje deputetit Bardhi “të pres me durim” vendimin e drejtësisë lidhur me “vërtetësinë e zbulimit prej tij të trafikantit të paidentifikuar”, ndërsa i kujton atij se duhet të përballet edhe me kallëzimin për shpifje.

“Kësisoj, Gazmend B duhet ta presë me durim edhe SPAK-un të na ndriçojë lidhur me vërtetësinë e zbulimit prej tij të trafikantit të paidentifikuar, siç priti me shumë durim, për plot muaj, radhën tek salloni i Blendi Fevziut për ta prezantuar këtë zbulim të ububushëm, çka tregon se nuk jemi përpara asnjë urgjence të posaçme përveç turravrapit të një shërbëtori ambicioz për të fituar besimin e padronit të ri. Plus, të treja pyetjet që autori i zbulimit më drejton nuk kanë asnjë lidhje me asnjë realitet faktik. Ato burojnë thjesht nga hipoteza haluçinante mbi të cilën ngrihet zbulimi i tij, për të cilin ai edhe është kallzuar menjëherë në SPAK nga vëllai im “trafikant”.  Për më shumë, rikujtoj këtu se ç’është në dorën e SPAK-ut, për çfarëdoqoftë e për këdoqoftë, aq më tepër për tim vëlla, nuk është dot në gjuhën time dhe nga ana tjetër, një interpelancë parlamentare, ku gënjeshtrat e thëna publikisht kthehen në pyetje për subjektin e tyre, do t’i njihte çdo gënjeshtari të drejtën e padëgjuar të kërkesës së llogarisë për gënjeshtrat e tij, ndërkohë që rregulli elementar i kësaj bote qëkur njeriu i dalë nga shpella u organizua shoqërisht, e do që gënjeshtari duhet të japë, jo të kërkojë llogari”, tha Rama.

Në fund duke ironizuar kalimin e Gazment Bardhit te Rithemelimi, kryeministri Rama thotë se “kalimi me një padron të ri po e bënë të krijojë hipoteza haluçinante”.

“Kështu që nuk është gjëkundi në përputhje as me detyrën, as me shkallën time të tolerancës ndaj ultësisë njerëzore, po as me nivelin minimal të dinjitetit të Kuvendit të ligjvënësve të Shqipërisë, që unë të ul përtokë çmimin e kohës së nevojshme për punët e mëdha e të vogla që kam detyrë të ndjek si i zgjedhur i popullit në drejtimin e vendit, për t’u angazhuar në një ndërveprim verbal me një shkelës mendjelehtë të ligjit e të çdo zakoni të mirë të këtij vendi, një kallzues i sapokallzuar për kallëzim publikisht të rremë dhe për çfarë?! Tamam për çështjen për të cilën kam fituar një gjyq për shpifje, me një vendim fajësie për padronin e vjetër të Gazmend B, shtetasin Lulëzim B, siç kam fituar deri më tash edhe 11 gjyqe për shpifje (10 të tjera janë në proces) për të tjera sajesa të ngjashme me të tjerë shërbëtorë të zellshëm si ky dhe me vetë padronin e ri të tij, një tjetër B, ku e ku më famëkeq se sa B-ja i mëparshëm, aspak rastësisht i vetmi ish-president e kryeministër në historinë e Europës, i shpallur Non Grata nga Shtetet e Bashkuara, për korrupsion madhor dhe minim të demokracisë”, shkruan Rama.

Më 1 prill deputeti demokrat Gazment Bardhi kërkoi një interpelancë urgjente me kryeministrin Edi Rama, në seancë  e 4 prillit, ku kërkon që kreu i qeverisë të jap sqarim për atë që ai e cilëson si “përfshirjen e vëllai të tij Olsi Rama në laboratorin e drogës në Xibrakë”.