“Gërdeci”/ Kërkoi 90 dëshmitarë, SPAK pranon 52, mes tyre Bumçin e Berishën. Shtyhet seanca ndaj Mediut

Është shtyrë për më datë 29 shtator seanca gjyqësore ndaj ish-ministrit të Mbrojtjes, Fatmir Mediu për çështjen Gërdeci.

Ish-ministri përmes avokatit të tij, kërkoi në seancën e 8 shtatorit thirrjen e 90 dëshmitarëve, por SPAK ka pranuar vetëm 52 dëshmitarë, mes të cilëve Shkëlzen Berishën dhe Aldo Bumçin.

Mediu akuzohet për shpërdorim detyre në shpërthimin që vrau 26 persona: burra, gra e fëmijë.

GJKKO ka pranuar më herët kërkesën që pjesë e seancave të jenë edhe familjarët e viktimave si palë e procesit ku gjykohet ish-ministri Mediu.

Vendimi i GJKKO-së është cilësuar “një fitore e vogël që e kemi kërkuar që prej vitit 2009” nga familjarët e viktimave.

Më 13 dhjetor të 2022-shit, ish-ministri i Partisë Demokratike gjatë qeverisjes së Sali Berishës, Aldo Bumçi u thirr në SPAK ku u mor në pyetje lidhur me hetimet për çështjen e Gërdecit, si person në dijeni.

Më pas më 26 janar të 2023, në SPAK u paraqit dhe djali i ish-kryeministrit Sali Berisha, Shkëlzen Berisha.

Hetimet për Gërdecin, ku emri i Shkëlzen Berishës është i përfshirë, kanë qenë arsyeja e paraqitjes së tij në SPAK. Asokohe Shkëlzen Berisha mohoi të kishte lidhje me ngjarjen.