Gjenden 5 fletë ari në një tempull në Norvegji

Shkencëtarët kanë zbuluar pesë thesare ari misterioze në Hov, Norvegji, të cilat mund të hedhin dritë mbi sekretet e një shoqërie të lashtë.

Pjesët e vogla prej ari, secila me 1 cm gjatësi dhe gjerësi, në të cilat ishin gdhendur figura që dyshohet se flasin për një periudhë para vikingëve  midis 476 dhe 750 pas Krishtit, u gjetën gjatë gërmimeve të një tempulli fetar pagan, duke u konsideruar si një gjetje e rrallë në Norvegji.

35 fletë ari janë gjetur në total në Hov në periudha të ndryshme, ndërsa mbi 3000 fletë të ngjashme në të gjithë Skandinavinë, sipas Ingunn Marit Rostad, një arkeologe dhe profesoreshë e asociuar në Muzeun e Historisë Kulturore në Oslo.

“Ato gjenden pothuajse në të gjithë Skandinavinë, por vetëm në Skandinavi. Ju keni të njëjtat imazhe të përhapura në të gjithë Skandinavinë, kështu që ato duhet të kenë nënkuptuar diçka, njerëzit duhet të kenë ditur se çfarë donin të thoshin dhe unë mendoj se ato duhet të kenë qenë të rëndësishme për t’u trajtuar në këtë mënyrë”, tha Rostad.

Artefaktet e fundit të dokumentuara u varrosën nën mure dhe brenda vrimave të strukturës, sikur të ishin vendosur qëllimisht, duke i shtyrë studiuesit të besojnë se fletët mund të kenë qenë një ofertë për ndërtesën. Njoftimi u bë nga Nicolai Eckhoff, një arkeolog dhe këshilltar në arkeologjinë e shpëtimit në Universitetin e Oslos, i cili u përfshi në gërmim.

“Ata na tregojnë një histori për rëndësinë e zonës në të cilën u zbuluan. Figurinat dhe (tempulli) konfirmojnë kështu se është si një seli pushteti në epokën e hekurit norvegjez të vonë“, tha Echkoff.

Mbetjet e tempullit Hov u zbuluan në vitin 1993 së bashku me dy figura ari. Gërmimet e mëvonshme gjetën 28 ​​fletë të tjera gjatë viteve në vijim, sipas  Science Norway , duke e bërë atë vendin me zbulimet më të shumta të petëve norvegjeze deri më tani. Pesë pjesët e reja dolën në dritë gjatë verës,  gjatë një gërmimi më të madh të mundësuar nga një projekt ndërtimi i një autostrade aty pranë, e njohur si E6.