Gjermania feston Ditën e Bashkimit, festimet 3ditore zhvillohen në landin më të vogël të 16 shteteve
Festimet e këtij viti për Ditën e Bashkimit të Gjermanisë zhvillohen në Shverin, kryeqytetin e landit lindor Miklenburg-Pommran, më i vogli i 16 shteteve federale. Kryeministrja e landit Manuela Schwesig duke shënuar fillimin e festimeve me prerjen e një torte gjigande për vizitorët tha se po festojnë me të gjithë Gjermaninë.
“Dita e Bashkimit të Gjermanisë është shumë e veçantë për të gjithë”- tha ajo, duke kujtuar guximin e popullit në Republikën Demokratike të Gjermanisë që doli në rrugë në vitin 1989. “Sot kemi privilegjin e madh të jetojmë në liri, paqe dhe demokraci”. – tha ajo.
Paralelisht me ceremoninë, vizitorët në qytetin e vjetër mund të shijojnë gatime nga të gjashtëmbëdhjetë shtetet gjermane. Gjermania Lindore dhe ajo Perëndimore ishin të ndara për 45 vite. Kjo ditë është shpallur edhe festë kombëtare, sepse më 3 tetor 1990 hyri në fuqi Traktati i Bashkimit me të cilin ish-Republika Demokratike e Gjermanisë iu bashkua Republikës Federale gjermane.
Megjithatë edhe 35 vjet pas rënies së Murit të Berlinit mes landeve lindore dhe perëndimore ka ende dallime politike, ekonomike dhe sociale. Shumica e njerëzve në lindje e vlerësojnë gjendjen e tyre ekonomike si të mirë, por kanë më pak besim tek institucionet demokratike sesa ata në Perëndim.