Gjyqi ndaj Trump, avokatët e ish-presidentit vunë në dyshim dëshmitë e ish-avokatit 

Java e pestë e gjyqit penal të Donald Trump në Nju Jork përfundoi ashtu siç filloi me ish-avokatin e ish-presidentit amerikan. 

Majkëll Kohen, dëshmitari kryesor në çështjen kundër Trump, u mor në pyetje nga prokurorët në Manhatan përpara se avokati mbrojtës i Tramp, Tod Blansh ta sulmonte gjatës seancës së pyetjeve. Blansh u përpoq të krijonte idenë se Kohen ishte  një njeri të cilit nuk mund t’i besohej. Përmes pyetjeve të shumta, avokati i Trump e detyroi Kohen të pranonte gënjeshtra të shumta të mëparshme, duke përfshirë disa që i kishte thënë për mbrojtur familjen e tij dhe jo Tramp. 

Pas seancës, shumë ekspertë thanë se mbrojtja kishte arritur të cenonte besueshmërinë e ish-avokatit të Trump si dëshmitar. Avokati Blansh u përpoq t’i tregojë jurisë se Kohen, i cili nga mik besnik, u kthye kundër ish Presidentit, ishte motivuar edhe nga hakmarrja, pasi ky i fundit nuk e emëroi atë në një pozicion të lartë në administratën amerikane në kohën që ishte President. 

Pas seancës Donald Trump u shfaq i lumtur duke e quajtur ditën e dëshmisë së ish-avokatit të tij, interesante. “Çështja ndaj meje nuk duhet të kishte nisur kurrë. Nuk ka asnjë ligj kundër sigurimit të një marrëveshjeje për të mos u zbuluar. Të gjithë mund të bëjnë një marrëveshje të tillë për arsye të ndryshme” tha Tramp. 

Ende nuk dihet nëse vetë Trump do të dëshmojë për të dhënë versionin e tij të ngjarjeve. 

Majkëll Kohen është dëshmitari i 19-të dhe i fundit i prokurorisë kundër Trump në gjyqin e parë penal ndaj një presidenti amerikan. Ai akuzohet e ka fshehur një pagesë prej 130 mijë dollarësh për aktoren e filmave për të rritur Stormi Daniels pak përpara zgjedhjeve të vitit 2016, në këmbim të heshtjes së saj për një marrëdhënie të dyshuar jashtëmartesore me Trump.