Gonzato: Mbështesim SPAK dhe reformën në drejtësi, duhet të kemi besim!
Ambasadori i Bashkimit Evropian në Shqipëri, Silvio Gonzato, i pranishëm në tryezën e organizuar nga Qendra për Studimin e Demokracisë, deklaroi se, procesi i vetingut ka bërë tashmë që Shqipëria të jetë në negociata për anëtarësimin e saj në BE.
Ambasadori theksoi mbështetjen që BE ka ndaj SPAK si një institucion i pavarur që kryen hetimet e një niveli të lartë dhe për mënyrën sesi funksionon ai.
“Që prej fillimit të procesit që çoi në reformën e drejtësisë të vitit 2016, BE ka mbështetur krijimin e një SPAK-u të fortë, të pavarur dhe llogaridhënës dhe ne do të vazhdojmë në të njëjtën rrugë. SPAK-u shpesh përmendet për punën e vet në hetimin e çështjeve antikorrupsion të nivelit të lartë, por ne kemi parë rezultate të rëndësishme edhe në përpjekjet e veta për të luftuar krimin e organizuar dhe ka shifra të qarta në lidhje me këtë çështje”, tha Gonzato.
Për ambasadorin, pavarësia e shërbimit të Prokurorisë duhet të jetë dhe është një parim kyç I demokracive moderne dhe duhet të mbrohet nga çdo lloji ndikimi i papërshtatshëm qofshin këto politike, institucionale, apo shoqërore.
“Ne kemi parë disa përmirësime cilësore për mënyrën sesi funksionon SPAK-u. Për shembull ka një mënyrë më sistematike të përdorimit të hetimeve financiare paralele me konfiskimin e aseteve dhe zyra e Posaçme e Prokurorisë ka krijuar bashkëpunim solid me homologët ndërkombëtarë përfshirë dhe në veçanti me BE-në, për të hetuar aktivitetet e grupeve të krimit të organizuar që tejkalojnë kufijtë dhe që sjellin pasoja të rënda dhe të drejtpërdrejta edhe në sigurinë e qytetarëve të BE”, tha ambasadori i BE-së në Shqipëri”.
Në të njëjtën kohë , vijon Gonzato, duhet që pavarësi të kryhet dhe të drejtpeshohet dhe me mekanizmat e llogari dhënies efektive, si rishikimi i pavarur gjyqësor i vendimeve të prokurorëve, rregullave transparente të përcaktimeve të çështjeve , mekanizmave efikas të ankimeve por edhe vlerësimeve dhe sistemeve të Vetingut për magjistratët në formë efektive.
“Bashkëpunimi ndërkombëtar është pikë kyçe pasi një ditë Shqipëria do të bëhet shtet anëtar i BE dhe kjo do të thotë edhe një bashkëpunim më i fortë në këtë front për këto çështje të rëndësishme të interesit të përbashkët të sigurisë. Ne do të vazhdojmë të punojmë me SPAK-un dhe BKH-në për të rritur më tej efektivitetin e punës së vetë duke mbështetur burimet njerëzore dhe kapacitetet operacionale, si dhe mbështetjen për të pasur mekanizma dhe mjete të sofistikuara hetimi dhe kapacitete të tilla në përputhje me standardet e BE-së”, tha ai.
Ne duhet të kemi besim tek arkitektura e reformës në drejtësi si ajo që mund të arrijë drejtpeshimin e duhur dhe të drejtë ndërmjet llogaridhënies dhe pavarësisë dhe të inkurajojmë të gjitha institucionet të punojnë kundrejt këtij objektivi”, tha ambasadori i Bashkimit Evropian në Shqipëri, Silvio Gonzato.
“Këto parime, llogaridhënia dhe pavarësia qëndrojnë në thelb të çdo shoqërie demokratike në të cilën në fakt sundon sundimi i ligjit dhe kur drejtësia ofrohet në formë të drejtë, të paanshëm dhe transparente”, tha Gonzato.
Ndaj tha ai, “nuk kam nevojë që t’ju them që procesi i integrimit në BE është një proces shumë impenjativ që kërkon vlerësimin dhe rekomandimin e përmirësimeve në sisteme sa u përket metodave, standardeve dhe procedurave. Prandaj të gjithë aktorët kanë rolin e tyre për të luajtur si shoqëria civile dhe parlamenti për të përmirësuar sistemin, por që kjo duhet të ndodhë me anën e dialogut konstruktiv të bazuar në të dhëna dhe ekspertiza për çështje të rëndësishme”.
