Greqi- Protesta për 16-vjetorin e vrasjes së një adoleshentit nga policia, Athina në gatishmëri të lartë
Qendra e Athinës është nën një siguri të shtuar këtë të premte (6 dhjetor), ndërsa marshimet dhe tubimet studentore do të shënojnë 16 vjetorin e vrasjes nga policia të 15-vjeçarit Aleksandros Grigoropulos. Vdekja e tij në vitin 2008 shkaktoi disa nga trazirat më intensive që Greqia kishte parë në dekada.
Një forcë e fuqishme policore prej 5 mijë policësh është vendosur anembanë qytetit për të penguar trazirat e mundshme.
Vendosja përfshin policinë kundër trazirave (MAT), njësitë e motoçikletave (DRASI dhe DIAS), policinë e trafikut dhe oficerët e sigurimit të shtetit. Exarchia, një lagje e njohur për përleshjet e shpeshta gjatë protestave, do të jetë nën mbikëqyrjen e patrullave të intensifikuara para, gjatë dhe pas marshimit.
Pajisjet e specializuara, duke përfshirë autobotet me ujë, do të mobilizohen, ndërsa dronët dhe helikopterët do të monitorojnë në kohë reale situatën për t’u përgjigjur shpejt ndaj çdo incidenti.
Masat e jashtëzakonshme të trafikut janë në fuqi në qendër të Athinës për shkak të demonstratave.
Natën e 6 dhjetorit 2008, disa orë pasi Grigoropulos u qëllua, mijëra njerëz u ngritën në rrugët e Athinës, duke i vënë flakën makinave, duke thyer vitrinat e dyqaneve dhe plaçkitur. Trazirat zgjatën për javë të tëra.
Oficeri i policisë përgjegjës për të shtënat u dënua me burgim të përjetshëm dy vjet më vonë, por më pas u lirua pas një vendimi të gjykatës së apelit.
